Lo Carnaval de Bizan de Menerbes : una institucion dins lo canton

Aqueste an encara Carnaval es arribat !

Lo Carnaval a Bisan es una tradicion…Dempuèi quora ? difficile de saupre… Podèm remontar tranquilament a la debuta del sègle XX segur ! Cada an torna arribar al mitan de l’ivèrn per rescaufar los còsses e los còrs abans de rintrar dins lo Caresma.

A l’ora d’ara las datas son fixadas en foncion del calendièr escolar : rendètz-vos pres per la dimenjada del mitan de vacancas d’ivèrn !

Per l’edicion 2020, quatre jorns de fèsta, totes una capitada, a començar per l’eleccion de Miss carnaval lo divendres de ser, una sala clafida de monde malgrat la data qu’èra lo jorn de la Sant Valentin.

Lo dissabte de sèr amb lo grop de musica London, la joinessa posquèt s’animar e dançar un brave moment de la nuèit dins un ambient agradiu.

Malgrat l’abséncia del solelh aqueste dimenge, lo passa carrièra foguèt un còp de mai una capitada. Las tradicionalas majoretas de Bisan dubriguèron lo cortègi. Puèi plaça al Sénher Carnaval, rei d’un jorn, seguit per un carivari de carris ont se posquèt encontrar d’unicòrnas, d’indians, de mexicans e quitament l’òme Nadal (s’èra perdut pauret !) La reina de carnaval amb sa rauba tota polida tancava la marcha. Tot aquò dins un tarabastal de bandàs e de batucadàs, de rire e de crits ! La fèsta foguèt apreciada tant pels badaires que pels mascarats, dels mai pichons als mai grands (cada annada lo club del tresen atge « lo Recanton » se retròban per desfialar !).

Carnaval s’esperlonga lo diluns de matin amb lo torn de taula : los joves del vilatge acompanhats de qualques musicians passan dins los ostals per questar un pauc de moneda que servirà a finançar la fèsta. En escambi d’una musiqueta lo monde balharà sa peçòta ! 

Per claure aquela fèsta : plaça al bal mascarat animat dempuèi 24 ans pel grop « Pierre Lebrun », dins la tantossada pels pichons, e fins al pichòt matin … pels mai grands. Es amb lo solelh levant que se manjaràn los creissents, que remplacèron la sopa a l’alh, e que nos direm a l’an venent !

Per totes los esfòrts fornits per una tan granda capitada, podèm mercejar totes los benevòls orquestrats pel comitat de las fèstas de Bizan de Menerbes.

A l’an que ven per un novèl Carnaval fòl !