Ma vista del carnaval

Adieu a totís !

Me trachi que vos ai pas encara contat lo Carnaval de Bisan ! Enfin pas dins los detalhs, amb ma vision de las causas. Vos vau doncas contar lo carnaval 2020, viscut per Amèlia Chabaud.

Tot comença la primièra setmana de las vacanças. Lo comitat de las fèstas de Bisan deu tot preparar, per la fèsta. Ieu èri en cors, posquèri doncas pas faire grand causa. Lo divendres la fèsta comença amb l’eleccion de Miss Carnaval. Tota una serada es organizada, nosautres los membres del comitat, preparam un repais que servissèm a taula. Per la serada i aviá un DJ, e èra lo president del comitat que fasiá la presentacion de las filhas e los diferents comentaris. Ieu èri al servici. Cadun aviá tres taulas de servir. Pendent aqueste temps las filhas fasian lo desfilat. A la fin passèrem a nòstras taulas per faire votar las gents sus un papieròt, puèi los anèrem mestre dins la boita sus la taula dels jutges. Un còp la deliberacion terminada, las Miss foguèron coronadas. Puèi la serada a contunhat amb lo Dj, e nosautres èrem darrièr lo bar per servir las bebidas a tot lo mond. Aquò durèt fins a 2h30 del matin. Un còp tot lo monde sortit de la sala, nosautres deviam demorar per recaptar un pauc e passar un còp de balaja per lo lendeman. La serada del dissabte se debana amb un grop, aqui èra lo grop LONDON. Arribèron dins la tantossada, per poder metre en plaça tot lor material. La serada començava a 22h. Mas nosautres èrem aquí plan abans, que nos caliá far manjar lo grop e nosautres tanben. Un còp las pòrtas dubertas las gents començèron de dintrar de mai en mai, nosautres encara un còp èrem a servir darrièr lo bar. Aquesta serada dura en general fins a 2h. E coma cada ser demoram un pauc mai fins als alentorns de 3h del matin, per recaptar e tot aquò. Lo dimenge es lo jorn de la cavalcada, es coma aquò que se sona la sortida dels carris. Aquò comença a 15h ieu èri dins lo grop de las majoretas de Bisan, nos rejonhèrem lo matin per se mascarar ensem e manjar un bocin. Ieu e ma cosina aviam tanben coma tasca de s’occupar de preparar las Miss. A l’entorn de 15h manca un quart, començèrem de partir fins al punch de partença dels carris. La cavalcada durèt fins a 18h-18h30. E coma cada annada, aquò s’acabèt a la sala de las fèstas. Las bandas presentas pendent lo carnaval jòguèron un pauc cadun a son torn puèi, lo grop prenguèt lo relai. A 20h faguèrem una pauseta per manjar e far manjar lo grop, e coma lo sèr passat tornèrem préner a 22h. E tot se debanèt coma lo dissabte de sèr. Lo diluns es una jornada particulara, perque dins tota la jornada los joves del vilatge fan lo torn de taula. Es a dire que passan dins los ostals amb un musician per reculhir un pauc de sòus per l’associacion. Dins l’après dinnada, lo grop « Pierre Lebrun » jòga per lo bal mascarat dels pichons. Aquò dura en general de 15h a 17h30. E lo comitat servís a beure e a manjar pels pichons.  Puèi es la pausa, fins a 22h30. Prenguèrem lo temps de parlar amb las gens del grop que coneissèm plan, perque venon aquí dempuèi 25ans. E puèi es la debuta del bal mascarat que durarà fins a 6h del matin. Dins un primièr temps, fins a mièja-nuèit, lo grop va jogar e cantar el metèis, puèi es una disco que començarà. Dançam e fasèm la fèsta fins a 6h del matin, aquí anam a la fornariá cercar de creissants e de chocolatinas per totes los valents que demorèron a la sala. Un còp aquò manjat e tot lo mond defòra, posquèrem començar a far lo grand recapte. Coma la serada es mai longa, evidentament la sala es mens pròpra…Del temps que lo grop recapta sos afars, nosautres passam la balaja et recaptam darrièr lo bar. Acabèrem als alentorns de 8h del matin, e anèrem sulpic nos colcar. Lo dimarç es pas acabat per lo comitat ! Que devèm encara tot recaptar, netejar e tornar menar al nòstre local. Devèm netejar la cosina e lo bar de cap en cima. Aquò nos pren en general de 15h a 18h30. Un còp tot aquò acabat podèm enfin s’anar pausar a l’ostal, e sèm plan contents que lo nòstre carnaval foguèsse una capitada !!!

PS : Ai doblidat de vos o dire mas es quand meme quicòm de fòrça important e que pren fòrça temps, mas cada ser servissiam a manjar de fritas e siá de magret siá un burger e de crespels. Evidentament tot aquò èra preparat per nosautres.